افراد کی تعداد 60سے تجاوز ،40سے زائد لاشیں نکال لی گئیں

برفباری اوربرفانی تودوں کی زد میں آکر جاں بحق ہونیوالے افراد کی تعداد 60سے تجاوز ،40سے زائد لاشیں نکال لی گئیں ، نیلم ویلی میں ایمرجنسی نافذ

نیلم (این این آئی) آزاد کشمیر کے ضلع نیلم میں حالیہ برف باری، گلیشئرز اور برفانی تودوں کی زد میں آکر جاں بحق ہونے والے افراد کی تعداد 60 سے تجاوز کر گئی، درجنوں مکانات برفانی تودے تلے دبے ہوئے ہیں جس کے باعث ہلاکتوں میں اضافے کا خدشہ ہے۔ علاقے میں شدید برفباری اور دشوار گزار علاقہ ہونے کی وجہ سے ریسکیو کرنے میں شدید مشکلات کا سامنا ہے، نیلم ویلی میں ایمرجنسی نافذ کردی گئی ۔ تفصیلات کے مطابق سرگن ویلی کے علاقہ بکوالی ،سرگن سیری،بازار میں جاں بحق افراد کی تعداد پچاس بتائی جارہی جن میں سے چالیس سے زائد لاشیں نکال لی گئیں جبکہ کیل میں پانچ اور ڈھکی چکناڑ میں چھ ،لوات بالا میں ایک، تہجیاں بنتل میں دو ،دودھنیال صبائی میں ایک شخص جاں بحق ہوا اور اس طرح مجموعی طور پر ساٹھ سے زائد افراد جاں بحق اور درجنوں افراد زخمی ہوئے ۔ ذرائع کے مطابق درجنوں مکانات برفانی تودے تلے دبے ہوئے ہیں علاقے میں شدید برفباری اور دشوار گزار علاقہ ہونے کی وجہ سے ریسکیو کرنے میں شدید مشکلات کا سامنا ہے۔ڈپٹی کمشنر نیلم راجہ محمود شاہد نے ضلع بھر میں ایمر جنسی نافذ کرتے ہوئے اسسٹنٹ کمشنر آٹھمقام راجہ عمر طارق کی سربراہی میں تمام انتظامی آفیسر ان کو الرٹ کرتے ہوئے سرگن کیلئے امدادی سامان جن میں ٹینٹ خیمہ جات، گرم کپڑے بستر،راشن اور دیگر ضروری اشیاء بھیج دی ہیں ۔ ڈی ڈی ایم اے شہری،دفاع اور دیگر ریسکیو ٹیمیں بھی پہنچ گئیں ۔ ڈپٹی کمشنر نیلم راجہ محمود شاہد کے مطابق نیلم ویلی میں ایمرجنسی نافذ کردی گئی ۔ انہوںنے کہاکہ انتظامیہ متاثرین کی بحالی اور متاثرہ علاقوں تک رسائی حاصل کرنے کیلئے تمام تر مشینری کے ہمراہ بھرپور کوشش کریگی، ضلع بھر میں ریسکیو ٹیمیں تشکیل دی گئی ہیں ۔ انہوںنے بتایاکہ نیلم ویلی کی تاریخ کا درناک ترین حادثہ ہے جو بیک وقت مختلف علاقوں میں پیش آیا۔

[X]